O filosofo Javier Sadaba diz que ye una perda de tiempo l’analís de l’aspecto churidico d’o prozeso d’ilegalizazión de EAE-ANV y EHAK, ya que, seguntes l’autor, no ye que un adorno. En iste articlo se zentra en l’ausenzia de bozes de denunzia en o Estau español, rematando que “uno d’os barraches con os que s’enclaba la cucha española más reyal ye Euskal Herria”.

Tanto EAE-ANV como EHAK-PCTV ban a estar ilegalizaus. En son dos, se diz, as bías por a que ban a disaparixer d’a bida politica. Una ye l’admenistratiba, que fa referenzia a un imbento clamau Lei de Partius y empentada por l’abogazía de l’Estau y o fiscal cheneral; y l’atra, a penal y do dezidirá o Chuche Garzón. As bías podeban aber-ne estau zinco, como as de Santo Tomás ta contrimostra a existenzia de Dios u diez, como os mandamientos. Iste chuego de rebullos churidicos nos dixa indiferens a más d’uno. No pas en o suyo conteniu, prou que no, sino en as suyas trazas. Parlen d’o que parlen, no se trata que d’a eszenificazión d’una dezisión que se prene con o zinismo propio con o que obra l’Estau cuan l’intresa. Tocaba ilegalizar y se ha feito. A resta son adornos. Poco pueden dudar de que ye asinas y muito ye o descaro que cal tener ta negar-lo. Por ixo, ficar-se en os bodiellos legals de tal ilegalizazión ye una perda de tiempo. Más aún, lo que ha feito no me sorprende mica. Y si beluno podió tener garra esperanza de que con iste gubierno as cosas serían diferens, lo unico que puedo dizir ye que les rodiaba una rariza inchenuidat; u una culpable ignoranzia.

Lo curioso, por tanto, no ye que se actua fendo serbir intresadamén a chustizia, que ye lo que se ha feito siempre y en funzión de mantener o poder. Lo curioso ye que pocas u garra boz (en zagueras, nobleza obliga, se ha meso en marcha un manifiesto de protesta) se alzen en o territorio español ta denunziar con rasmia lo que ye suzedendo-ie; ye dizir, pribar d’o dreito a boto a una parti mica despreziable d’Euskal Herria; y ixo independienmén d’a balor que uno le dé a botar u no.

Permita-se-me, en iste punto, remerar a mía experienzia personal. En o zaguer mes, y entre atras cosas, me han trucau ta partizipar en o Foro Sozial Mundial u en a Plataforma ta encausar a Aznar por a imbasión d’Irak. Me parixe bie. Pero dengún no me ha trucau ni a yo ni, en lo que conoxco, a dengún ta discutir y prener postura sobre lo que ye suzedendo en Euskal Herria. Ye como si ista mena de problemas se esen tachau de l’achenda de cualsiquier programa d’a cucha. Ye como si os repuis d’un pensamiento resisten debán d’o poder en curso se esen ixucau en lo que pertoca a o País Basco. Por medrana, por desencanto, por indiferenzia u por atras enchaquias pseudoideolochicas, a soledat ye total y o desierto no dixa beyer o más menimo oasis.

Se ochetará que han estau os defectos achacables a la cucha abertzale los que han produziu ditas actituz. No seré yo qui niegue que una seriosa autocretica ha a menister en as ringleras de l’independentismo basco. Pero d’astí a la dixadez total i hai un abismo. Porque existe o dreito a la libre autodeterminazión con a suya consiguién aplicazión reyal y no fictizia, a la libertat ideolochica que no tiene por qué acomodar-se a iste u atro partiu ya domesticau, y a no azeptar as güegas de toda mena que imposan os estaus existens. Y, más que más, porque a chen de berdat democrata ha de plegar dica la fin, estar consecuén; estar, en suma, radicalmén democratas. Y lo que ye suzedendo, a la contra, ye l’anulazión d’a democrazia.

Fa poco un beterano y admirable abertzale me dizió a suya dezepzión por a pasibidat cheneral debán d’o que él clamaba “a caza d’o basco”. No sabría guaire bien qué contestar-le. Por un costau, no ye l’inte ta cargar as tintas sobre os defectos antis ditos. Y, por atro, no puedo que costatar una begada más que uno d’os barraches con os que choca a cucha españolista más reyal ye Euskal Herria. En iste caso gosa suspender. Quí sabe si bi abrá un setiembre ta aprobar. Pero entre suspenso y aprobau, ¿no se abrían d’aber cudiau más as rilazions con atros pueblos, prenzipiando por os más amanaus?